Puntland oo sheegtay in awoodo ka baxsan maamulka ay ku lug yeelan karaan soo-noqoshada burcad-badeedda

GAROOWE,Soomaaliya – Iyadoo ay sii kordhayaan weerarrada iyo afduubyada maraakiibta ee xeebaha Soomaaliya, gaar ahaan xeebaha Puntland, maamulka Puntland ayaa sheegay inuu hayo xog muujinaysa in “awoodo ka baxsan Puntland” ay ku lug yeelan karaan howl-gallada cusub ee burcad-badeedda.

Wasaaradda Amniga iyo DDR ee Puntland ayaa 21-kii Agoosto sheegtay inay waddo baaritaan gaar ah oo ku saabsan xogtaasi, iyadoo tilmaantay in kooxaha burcad-badeedda laga yaabo in loo adeegsanayo dano siyaasadeed iyo kuwo dhaqaale. Puntland waxay sidoo kale sheegtay inay jiraan mas’uuliyiin siyaasadeed iyo kuwo dhaqaale oo gabaad siinaya kooxaha burcad-badeedda.

Hadalka Puntland ayaa dhaliyay su’aalo badan oo ku saabsan cidda ay ula jeeddo “awoodaha ka baxsan Puntland”. Ilaa hadda maamulka Puntland si rasmi ah uma magacaabin dowlad, hay’ad ama mas’uul gaar ah oo uu ku eedeynayo inuu ka dambeeyo dhaqdhaqaaqyada burcad-badeedda.

Si kastaba, eedeymahan ayaa kusoo beegmaya xilli xiriirka siyaasadeed iyo kan amni ee Puntland iyo Dowladda Federaalka Soomaaliya uu yahay mid aad u xasaasi ah. Sidaas darteed, waxaa jira fasiraado siyaasadeed oo sheegaya in hadalka Puntland uu si dadban ugu jeedi karo dhinacyo ka baxsan maamulka, balse arrintaasi weli ma hayso xaqiijin rasmi ah.

Markab hub u siday Turkiga oo la afduubtay

Xaaladda ayaa sii cakirantay kadib markii burcad-badeeddu ay 17-kii Agoosto xeebaha Puntland ka afduubeen markabka M/V LUTUF, oo watay calanka Cameroon.

Markabka ayaa lagu qabtay meel u dhow Marraya, degmada Eyl, iyadoo la sheegay inuu siday hub, qalab isgaarsiineed iyo qalab dayax-gacmeed oo ku wajahnaa xarunta tababarka ciidamada Turkiga ee Muqdisho. Markabka waxaa saarnaa 10 qof oo isugu jiray lix Hindi ah, muwaadin Turki ah, muwaadin Georgian ah iyo laba ilaalo oo Serbian ah.

Wararka kasoo baxaya xeebaha Nugaal ayaa sidoo kale sheegay in hawlgallo dhinaca cirka ah lagu beegsaday doon yar oo lala xiriiriyay kooxihii afduubtay markabka. Afar qof ayaa la sheegay inay dhinteen, halka laba kalena ay dhaawacmeen, inkastoo cidda si rasmi ah u fulisay weerarka aan weli si cad loo xaqiijin. Dowladda Turkiga iyo Dowladda Federaalka Soomaaliya ayaan si rasmi ah uga hadlin weerarkaasi.

Burcad-badeedda oo mar kale soo xoogeysanaysa

Dhacdooyinkan ayaa muujinaya soo-noqoshada khatarta burcad-badeedda Soomaaliya kadib sannado ay weerarradu aad hoos ugu dhaceen.

Warbixinno cusub ayaa sheegaya in dhowr markab lagu qafaashay ama lagu weeraray gobolka tan iyo bilihii hore ee 2026, taas oo walaac cusub ku abuurtay maraakiibta ganacsi ee mara Gacanka Cadmeed iyo Badweynta Hindiya.

Waxaa sidoo kale jira warar sheegaya in kooxaha burcad-badeeddu ay helayaan taageero iyo sahay xeebaha ah, halka qaar ka mid ah dadka deegaanka ay sababta soo-noqoshada burcad-badeedda ku xiriirinayaan dhaqaale xumo iyo shaqo la’aanta ka jirta deegaanada xeebaha.

Puntland ayaa hadda sheegtay inay baaritaan ku hayso cid kasta oo ay tuhunsan tahay inay ka dambeyso ama fududeynayso howl-gallada burcad-badeedda.

Dayax Media ayaa sii wadi doona la socodka xaaladda iyo wixii warar rasmi ah ee kasoo baxa Puntland, Dowladda Federaalka Soomaaliya iyo dowladda Turkiga.