Geeda-Qorow oo Amar culus dul-dhigay Ganacsatada Xoolaha

Dowladda hoose ee magaalada Dhuusamareeb ayaa amar cusub dul-dhigtay ganacsatada xoolaha ee magaaladani.

Guddoomiyaha ahan duqa caasimadda Galmudug mudane Cabdiraxmaan Cali Maxamed(Geeda-Qorow) ayaa faray dhammaan ganacsatada xoolaha in ay u wareegaan suuqa cusub ee loo qorsheeyay xoolaha.

Dowladda hoose ee Dhuusamareeb ayaa waayadii dambe waday dedaallo ay ku doonayso in suuq cusub loo raro seeladda xoolaha.

Ganacsatada xoolaha qaar ayaa u sheegay Dayax Media in ay tallaabadani soo dhoweynayaan islamarkaana suuqa cusub ay rajaynayaan inuu wax ka beddalo ganacsiga xoolaha ee magaalada.

Muddooyinkii dambe waxaa caasimadda Galmudug ka socday dib u dhisyo lagu sameynayay Kaaba-yaasha dhaqaalaha oo ay ku jiraan waddooyinka, iyadoo la dhisay laamiga dheer ee magaalada kala dhex-mara.

Qorsheyaashan ayaa u muuqda kuwa wax badan ka beddali doona arrimaha ganacsiga iyadoo la filayo inay ka qeyb qaataan kobaca dhaqaalaha ee Galmudug.

Dayax  Media Network

Galmudug, Somalia